कुलसंमेलन

नागांव कुल संमेलन २०२३ इतिवृत्त

तारीख –  २५ व २६ फेब्रुवारी २०२३

स्थान – सिंधूसागर हॉलिडे होम,  कोठारभात लेन, नागांव, तालुका अलिबाग , जिल्हा रायगड

उपस्थिती …. एकूण ४०० व्यक्ती माहेरवाशीणींसह

बाहेरून आलेल्या लोकांची राहण्याची सोय नागाव येथील सर्व आठवले कुटुंबांनी त्यांच्या रिसॉर्ट मध्ये विनामुल्य अतिशय उत्कृष्ट केली होती. जवळजवळ २०० लोकांची राहण्याची सोय केली गेली.

कार्यक्रमासाठी सिंधुसागर येथे भव्य मांडव टाकण्यात आला होता व भोजनासाठी जवळच तसाच  दुसरा मांडव टाकण्यात आला होता. दोन दिवस चालणाऱ्या या कार्यक्रमात तीन वेळचे जेवण, नाश्ता, चहा इत्यादीचा समावेश होता.

दि. २५ रोजी सकाळी साडे साडेदहा वाजता गणपती मंदिरात अथर्वशीर्ष पठणाने कार्यक्रमाची सुरुवात झाली त्यावेळी नागाव येथील व बाहेर गावांहून आलेली काही आठवले मंडळी उपस्थित होती. बारा वाजता, येणाऱ्या सहभागी व्यक्तींची नाव नोंदणी व त्यांच्या निवासाच्या व्यवस्थेची सुरुवात करण्यात आली.  तीन वाजेपर्यंत भोजन व विश्रांती आटोपल्यावर,  श्री केदार विनायक आठवले यांचा व्हॉइस कल्चर व संधी या विषयावर दृकश्राव्य कार्यक्रम झाला. साधारण सव्वा तास चाललेल्या या कार्यक्रमात अतिशय महत्त्वपूर्ण माहिती श्री केदार यांनी दिली. खूप मनोरंजक असा हा कार्यक्रम झाला व सर्व श्रोत्यांना खूप आवडला.

या कार्यक्रमानंतर चहापान व सभासदांना नागांव समुद्रकिनारी जाण्याची मुभा होती. सायंकाळी साडेसहा वाजता विविध करमणुकीचे कार्यक्रम सादर करण्यात आले. यामध्ये नागाव येथील मंडळी तसेच बाहेर गावांहुन आलेल्या काही कलाकारांनी भाग घेतला. अतिशय रंजक असा हा कार्यक्रम होता.

रात्रीच्या भोजनानंतर श्री. सौरभ उदय आठवले यांनी खगोल शास्त्र व आकाशदर्शन यावर अतिशय माहितीपूर्ण व्याख्यान दिले व सर्वांना दुर्बिणीतून प्रत्यक्ष नक्षत्र बा तारे यांचे दर्शन घडविले. रात्र खूप झाली असून सुद्धा बहुतेक मंडळींनी ह्याचा लाभ घेतला. नंतर सर्व आपापल्या निवासस्थानी विश्रांतीसाठी गेले.

दुसऱ्या दिवशी सकाळी म्हणजे दि. २६ रोजी नऊ वाजता मुख्य कार्यक्रमास सुरुवात झाली.  त्याआधी सर्व सभासदांना नाश्ता देण्यात आला. कार्यक्रमाला प्रमुख पाहुण्या म्हणून सौ. अंजली आनंद आठवले एम. एस. सी., पी. एचडी. (न्यूक्लियर केमिस्ट्री) या उपस्थित होत्या. कार्यक्रमाची सुरुवात प्रमुख पाहुणे,  फाउंडेशन अध्यक्ष व इतर पदाधिकारी, नागांव येथील कार्यकारणी चे पदाधिकारी यांच्या हस्ते श्री. परशुराम. श्री. व्याडेश्वर, श्री. योगेश्वरी व श्री गणपती यांच्या पूजनाने व दिपप्रज्वललाने झाली. याच दिवशी स्वा. वि. दा. सावरकर पुण्यतिथी असल्यामुळे त्यांच्याही प्रतिमेचे पूजन करण्यात आले. यानंतर सौ बापट व सौ.आठवले यांनी सरस्वती वंदन करून कार्यक्रमाची सुरुवात केली. सर्व मान्यवर मंचावरती स्थानापन्न झाले व सर्वप्रथम,  गेल्या एक वर्षात जे माननीय सदस्य दिवंगत झाले त्यांना श्रद्धांजली अर्पण केली गेली. त्यानंतर मागील कुल संमेलनानंतर म्हणजेच एक मार्च २०२० नंतर ज्यांनी आपल्या वयाची ७५ वर्षे पूर्ण केली अशा व्यक्तींचा पुष्पगुच्छ व नारळ देऊन सत्कार करण्यात आला. तसेच फेब्रुवारी महिन्यात ज्या सदस्यांचे वाढदिवस होते त्यांनाही वाढदिवसाच्या शुभेच्छा देण्यात आल्या.

आपल्या फाउंडेशनच्या वृद्धीमध्ये ज्या व्यक्तींनी योगदान दिले आणि तेही विनामूल्य , अशा श्री. महेश अनंत आठवले, कंपनी सेक्रेटरी,  श्री. प्रीतम आठवले, चार्टर्ड अकाउंटंट,  व सौ. मुग्धा वाड (यांनी पूर्वीच्या कुलवृत्तांतातील माहिती युनिकोड मध्ये करून दिली) यांचा पुष्पगुच्छ, नारळ व भेटवस्तू देऊन सत्कार करण्यात आला. या मान्यवरांची ओळख श्री विनायक विष्णू यांनी थोडक्यात करून दिली.

नागांव कुल संमेलनानिमित्त फाउंडेशन तर्फे जे सुसंवाद हे त्रैमासिक काढण्यात येते , त्याची स्मरणिका काढण्यात आली. त्याचे प्रकाशन प्रमुख पाहुणे व इतर मान्यवर यांच्या हस्ते करण्यात आले. हीच स्मरणिका हजर असलेल्या प्रत्येक सभासदास देण्यात आली.

त्यानंतर श्री विनायक विष्णू यांनी प्रमुख पाहुणे सौ अंजलीताई यांचा थोडक्यात परिचय करून दिला. सौ अंजलीताई यांनी प्रमुख पाहुणे म्हणून आपले विचार मांडले. एकंदर उच्च शिक्षणामध्ये असलेल्या संधी तसेच त्यासाठी करावयाची तयारी याबाबत त्यांनी विस्तृत विवेचन केले. अतिशय उत्तम असे मार्गदर्शनपर असे त्यांचे भाषण झाले

नंतर वेळ होती ती फाउंडेशन चे कार्य व फाउंडेशन तर्फे तयार करण्यात आलेली वेबसाईट आणि कुलवृत्तान्त याविषयी निवेदन करण्याची. श्री श्रीकांत आठवले, फाउंडेशनचे उपाध्यक्ष, यांनी दृकश्राव्य पद्धतीने सर्व माहिती सभासदांना दिली.  आपले एक सदस्य कैलासवासी विजय मुकुंद आठवले यांनी त्यांच्या हयातीत फाउंडेशनला वेळोवेळी जे मार्गदर्शन केले व आर्थिक मदतही केली त्याबद्दल त्यांना परशुराम मूर्ती व मानपत्र देऊन सत्कार करण्यात आला. हा सत्कार त्यांच्या सुविद्य  पत्नी श्रीमती विभावरी आठवले यांनी स्वीकारला. श्री वसंत गणेश आठवले यांनीही आपल्या फाउंडेशनला एक देणगी देऊन शैक्षणिक क्षेत्रात आठवले मंडळींना मदत करण्यासाठी त्या निधीचा वापर करावा असे सुचवले होते. त्यानिमित्त त्यांचाही परशुराम मूर्ती व पुष्पगुच्छ देऊन सत्कार करण्यात आला

श्री विद्याधर गणेश आठवले यांनी “माती विना शेती” या विषयावर इजराइल तंत्रज्ञानाने पडीक जमिनीत सुद्धा उत्तम शेती कशी करता येईल यावर सखोल , अभ्यासू भाषण केले. त्यांचा अनुभव व भाषणाची शैली यांचा उत्तम प्रभाव श्रोत्यांमध्ये  पडला.  या कार्यक्रमानंतर सर्वजण भोजनाचा आस्वाद घेण्यासाठी गेले. अत्यंत आपुलकीने अत्यंत चविष्ट असे भोजन सर्वांना देण्यात आले

शेवटच्या सत्रात श्री अनिल महादेव, अध्यक्ष चित्पावन आठवले फाउंडेशन, यांनी सर्व कार्यकर्ते, कार्यकारिणीचे सदस्य, ज्यांनी ज्यांनी या कुलसंमेलनात सेवा प्रस्तुत केली अशा सर्व मंडळींचे आभार मानले.

संपूर्ण वंदेमातरम या राष्ट्रगीताने  कार्यक्रमाची सांगता झाली

नागावकर मंडळींनी हे संमेलन उत्कृष्ट व देखणे व्हावे यासाठी फार मेहनत घेतली होती. कुलसंमेलनाचे काटेकोर नियोजन व उत्तम सादरीकरणाचा एक मानदंड आठवले कुलसंमेलन समितीने घालून दिला. सर्व उपस्थित मंडळींनी त्यांचे आभार मानले व कौतुक केले. पुढील संमेलन 2025 साली घेण्याचे ठरले.